fbpx

ເວັບໄຊທ໌ທາງການຂອງການບິນລາວ

ເຮືອບິນ Airbus A330 ເຂົ້າສ້ອມບຳລຸງລະດັບ A ຄັ້ງທຳອິດໃນປະຫວັດສາດ ທີ່ອູ່ສ້ອມແປງຂອງລັດວິສາຫະກິດການບິນລາວ ທີ່ສະໜາມບິນສາກົນວັດໄຕ, ນະຄອນຫຼວງວຽງຈັນ. ເຮືອບິນ Airbus A330 ຂອງຫວຽດເຈັດແອ ເລກທະບຽນ VN-A814 ເດີນທາງມາຮອດສະໜາມບິນສາກົນວັດໄຕ ໃນຕອນເຊົ້າ ວັນທີ 09 ກໍລະກົດ 2023 ເວລາ 06:00. ເນື່ອງໃນໂອກາດອັນພິເສດນີ້, ທ່ານຄຳຫຼ້າ ພົມມະວັນ ຜູ້ອຳນວຍການໃຫຍ່ ຂອງລັດວິສາຫະກິດການບິນລາວ ກໍ່ໄດ້ເດີນທາງມາຕ້ອນຮັບ ທ່ານ Nyugen Duc Thinh ຮອງຜູ້ອຳນວຍການໃຫຍ່ ຂອງສາຍການບິນຫວຽດເຈັດ ທີ່ໄດ້ເດີນທາງມາພ້ອມກັບຖ້ຽວບິນດັ່ງກ່າວພ້ອມດ້ວຍທີມງານ.
ທີມງານເຕັກນິກຂອງສາຍການບິນ ຫວຽດເຈັດແອ ຈະເປັນຜູ້ຈັດຕັ້ງປະຕິບັດການສ້ອມບຳລຸງລະດັບ A ໃນອູ່ສ້ອມແປງຂອງການບິນລາວ, ເຊິ່ງການສ້ອມບຳລຸງກໍ່ຈະມີການກວດກາເບິ່ງລະບົບຂອງເຮືອບິນ ແລະ ບັນດາອຸປະກອນຕ່າງໆ ຕາມຄູ່ມືສ້ອມບຳລຸງ, ພ້ອມທັງຮັບປະກັນໃຫ້ເຮືອບິນຢູ່ໃນມາດຖານຄວາມປອດໄພ ຕາມທີ່ເຈົ້າໜ້າທີ່ການບິນກຳນົດໄວ້.
ເຫດການຄັ້ງປະຫວັດສາດນີ້ແມ່ນເຫດການທີ່ສຳຄັນຂອງການຮ່ວມມືລະຫວ່າງ ລັດວິສາຫະກິດການບິນລາວ ແລະ ຫວຽດເຈັດແອ, ພາຍຫຼັງພິທີເຊັນບົດບັນທຶກຄວາມເຂົ້າໃຈ ທີ່ໄດ້ລົງນາມເຊັນ ໃນວັນທີ 31 ພຶດສະພາ 2023 ທີ່ຜ່ານມາ. ຜົນສຳເລັດດັ່ງກ່າວ ຍັງໄດ້ສະແດງໃຫ້ເຫັນເຖິງການຮ່ວມມືທີ່ແໜ້ນແຟ້ນລະຫວ່າງສອງສາຍການບິນ ແລະ ໃນອະນາຄົດກໍ່ຈະມີເຮືອບິນອີກຫຼາຍລຳ ທີ່ບິນມາໃຊ້ບໍລິການໃນອູ່ສ້ອມບໍາລຸງຂອງ ລັດວິສາຫະກິດການບິນລາວ ໃນລະຫວ່າງປີ 2023 – 2025.
ຄະນະນຳ ແລະ ຜູ້ບໍລິຫານຂອງ ລັດວິສາຫະກິດການບິນລາວ ຂໍສະແດງຄວາມຂອບໃຈຢ່າງສູງມາຍັງ ຫວຽດເຈັດແອ ທີ່ໃຫ້ຄວາມໄວ້ວາງໃຈ ແລະ ເຊື່ອໝັ້ນ ລັດວິສາຫະກິດການບິນລາວ. ພວກເຮົາຫວັງວ່າການສ້ອມບຳລຸງໃນແຕ່ລະຄັ້ງຈະດຳເນີນໄປດ້ວຍດີ ແລະ ກໍ່ຫວັງວ່າການຮ່ວມມືໃນຄັ້ງນີ້ຈະເປັນຈຸດເລີ່ມຕົ້ນຂອງການຮ່ວມມືໃນດ້ານອື່ນໆ.